曾經有生態學家嘅研究發現，雀鳥確實懂擇木而棲。上一集《大自然之聲》「大埔滘自然護理區特輯」帶大家走入大埔滘自然護理區認識不同雀鳥，而今集將會認識雀鳥以及其他生物嘅「家」！

大埔滘自然護理區原本稱為大埔滘植林區，呢個自然護理區面積達到四百六十公頃，而政府喺1977年將呢度劃為特別地區，亦係香港首個特別地區。堪稱全港最成熟嘅次生林大埔滘郊野公園裏面，有由幾十年前開始種植嘅人工林，區內樹木有成一百幾十種咁多，唔單止有上世紀二十年代開始種植嘅松樹、白千層、紅膠木，仲混雜左唔少本地樹木，例如樟樹、榕樹、柯樹等，針葉林同闊葉林交錯生長。就係豐富多樣嘅植物品種，令到呢度錄得超過160種雀鳥外，生物多樣性亦都極高，可以話大埔滘自然護理區係學習植物及自然知識嘅最佳地點。

香港大學生物科學學院首席講師侯智恒博士早前率領《大自然之聲》錄音及製作團隊一行七人，深入大埔滘採集自然環境聲音及發掘裏頭嘅知識。點解大埔滘嘅原生林曾經被砍伐到幾乎所餘無幾？白花鬼針草點解被列為其中一種「危害力最高的入侵植物」？邊個喺葉片上面「鬼劃符」？ 你又知道幾多植物知識呢？